Буджєнина

Приближáвуть ся вже сята.
Дух Руздва уже усягды:
В центрах варошув смереки
У світлах малых, далеко
Видко їх, які парадні,
Натуральні, файні, ладні,
Стоять си и челядь тішать,
Никому вто нич не мішать,
Люди ходять, позиравуть,
Фоткавуть ся, радусть мавуть...

Ги порядный моравак,
Сохтажом, таги руснак,
Вд сятам чоловік ладить ся,
Штось не дуже му сидить ся
Супукуйно таги другым,
Має дяку, иппні туги:
Мняса файного купив,
Помолов, перчив, солив,
Се руками пак гнявив,
Чеснока там надавив,
Ще до того солонину
И якусь тучну рыбину
Чимись добре натирав -
Щиру радусть з того мав.

Каже:"Буду йсе будити,
Бо сякоє я робити
Люблю дуже у зимі,
Кой си зробиме самі!"

Вже в буділці вгинь горить,
З комина фест дым дымить...
Файна фрішна зимня днина,
Пікниця и солонина
Висять файно вже на гаках,
Пес ся вблизує, сарака,
И тайком прибіг в наш двур,
Чорный, таги чорт мацур...

Діти бігавуть довкола,
Се для них од Няня школа!
Кедь вповісти правду, чесно:
З Taťkou дуже интересно!

Вєдно цілый динь будили,
Фурт дрова йому носили,
А до хіжі йшли на чай
И казали: "Пецугай,
Читавый ты у нас, Мамко!
Татька кличе на слив'янку!
Пый од нам увон будити,
Буджєнину спорядити...

Динь утік в роботі скоро,
Фараґлованя напором
Файту вичур изморило,
Файно вд ночи приладило.
Діти в постіль пушли спати,
Треба їм попочивати...
Нучка поміняла днину,
Ґазда вшитку буджєнину,
В лавор читавый изклав,
Гакы иппно з ниї зняв...

Хоть ґазда в ня не руснак -
Шпурувливый моравак,
Хоче вшитко своє мати,
Вбы на сята хосновати...