Чути звун в нидїлю рано

Чути звӯн в нидїлю, рано,
Нōвта му селом плыне.
Хоче чилядь позганяти,
В церкви служба - мы спиме.

Нōвта го плыне далеко,
Дись дōсїгат до гранок.
Чилядь го не вся учує,
Рознесло нас, ги пісок.

Айбо, ги по механїзму,
У нидїлю звӯн гуде.
Доста мало, но за ним пак,
Рано в цирькōв ся иде.

Чути звӯн в рӯчноє сято,
Коли храму йде ōбход.
Было сяк тай буде дале,
Бо сōхтує си народ.

На вечӯрню нōвта красна
Ллє ся небом на село.
Вчуєме - тай хрест на себе,
Персты три йдут на чоло.

Смутный звӯн за чōлōвіком,
Коли ōпрувӯд иде.
Жалӯсна приходит нōвта,
Та чилядня в тын веде.

Радосно є на Великдинь,
Чути звоны до небес.
Кличут нас тай вōзвіщают,
Ож Гōспōдь, Христос Воскрес!