Дуркат нам у двирі студїнь

Дуркат нам у двирі студїнь,
Листьом всьо ся затрясло.
Што ся лишило, примерзат,
Перестигло вже вино.

Дыхат тяжко полонина,
Кашле на гранкы й село.
Вже сьме ся май пōвбирали,
Айбо йсе не помогло.

Скоро нӯч май дōвга буде,
А з нив цімбора мороз.
Сонце вкаже ся тай втїкне,
Мало буде теплых доз.

Може світла зась не буде,
Гет потемок нас изість.
Айбо буде, вже як буде -
Видав, каждый сяк пōвість.

Шпор дрывами годовати,
Най си комено дымит.
Добре буде фурт у хыжи,
Там де теплота сидит.

Та паруйме ся помалы,
До мōрōзӯв, закі час.
Всьо тото ся перебуде,
Кобы вшитко добре в нас.