Грибарі

Долиш сōнїчко ся вкаже,
Чим рано настане -
Хōдят люди по гранках,
Ги, кōй партизане.

Тōты люди - грибарі,
Выхōдят усяды.
За исе бы вже писати
Спӯванкы й балады.

Кажда гранка, хамникы -
Де лише ни были.
Про хвороты, бӯль в ногах,
Вни давно забыли.

Долиш путикы хащами
Усяды прōмісили,
Коли глядали си грибы
Тай дōмӯв носили.

Фрішнота, сильнї дōжджі,
Чилядь ни спирали.
У кльонках мнōгі ишли,
Грибикы збирали.

Най выд нашых грибарӯв
Грибы ся ни прячут,
А самі у грубу тōрбу
Прийдут, та поскачут.

Пōвну тōрбу каждый динь
Тай ташку до того.
Убы каждый си грибарь
Изнїс грибӯв много!