Як в моминтї застудило

Як в моминтї застудило:
Дощик, віхор, фрішнота́.
Уже гет за нас забыла
Жа́рка, літня теплота́.

Як нам было надōїло,
Бо фурт спека, як тепло́.
Уже скоро мороз вдарит,
По бōлōту буде скло.

Тай калы́ усї померзнут,
Бо типирь ни мож прӯйти.
Мы пару́йме ся до зимы,
Їй бы скоро 'д нам ити.

Будеме ся вшиткі гріти
Пиля шпора й пити чай.
А типирь, в ōсїннї буднї,
Христе Боже, помагай!

Бо роботы дуже много,
А чим дале студино.
Йщи бы квасити капусту,
Убырвати гет вино.

Стру́ча лущити, пожа́ти,
Гет помыкати бурак.
Руснак буде без роботы?
Хыба, кōй засвище рак.