Колядованя на Сятый вечур

В ортодоксного християнина:
И в гуцула, и в русина,
И в українцюв, в словаку,
Славити днесь Бог дав дяку!
В грекув, в сербув и в болгарув,
Вечур, дякувати Дару
Господа, Царя, Отця,
Буде ся днесь без кÿнця!

Бо Исусик днесь ся вродить,
Світ собов облагородить,
Надію дасть многым людям,
Верне в віру тых, што блýдять
В темноті, без Світла Бога,
Де несупукÿй, тривога,
Страх, грызота, зависть, зло...
Подарить любви тепло!

Будуть Ангелы літати
И красно колядовати,
Из малинькыми дітьми,
Из ушиткыми людьми,
Бо колядка наша красна -
"Рождество" и "Звізда ясна"
Най усягды файно чути,
Як Исуса славлять люди!

Най ся держит сохтаж давный,
Най честувуть День сесь славный!
Так як предкы сановали,
Цілу нÿч колядовали
И співали файно своє,
Бо вто Мамино - сятоє!
Подержи нам сесь сохтаж
Превеликый отче наш!