Красна днина у июню

Красна днина у июню,
Де лиш хоч не позирай:
Туйкы поле, тамкы горы,
А ушитко - земный рай!

Грибы перві ся вказали,
Єден туй, а другый там.
Ягӯдкы уже достигли,
Доста їх ушиткым нам!

А трава яка, нїврōку!
Цвіте пōвно косичок.
Пōтят спӯв далеко чути,
Играт нōвту пōтӯчок.

Сōнїчко у динь пригріє,
Пак позираш - туча йде.
Така свіжōсть по дожджови,
Бӯльш не є, видав, ниґде.

Фрішно зрана у селови,
Увечирі - студино.
Грезно вже ся рōзпустило,
Буде доброє вино.

Черишинь ити бы рвати,
Убпалинї вни, ги грань.
Ритькы, пера из цибулї,
До лиш на гōрōдї стань.

Буль уже си мож купити,
Ōни з маслом первый клас!
Красна днина у июню,
Лїто файноє у нас!