Кулько яблок в Мидовому

Кӯлько яблок в Медовōму,
Пō кӯсницях, при пути.
Все си вырву, кōй на грибы
Зберу рано ся прӯйти.

Яблӯнок усяды доста,
Насадили їх давно.
Як иду путьом, ид гōрі,
Вырву все си хōть єдно.

Всякі яблыка, всякинї!
Застелили гет паллак.
А кōтрі ся файно держат,
Та достигнут вже май пак.

Доста сōку мож давити,
Тай сушити сушиниць.
Другі в міхы, та здавати,
Инак прийде їм кониць.

Много яблок в Медōвōму,
Фурт туй добрый урожай.
Я ся прӯйду, все си вырву,
Кoтрoй буде ми кам-май.

Пару в тōрбу си пoкладу,
За исе ачий не гріх.
Доста яблок, зимлю стилят,
Назбирав бы нараз міх.