Місяць зміну выдробив си

Місяць зміну выдробив си,
Й сōнїчко устало,
В теплый авґуст, до роботы,
Чилядь позганяло.

Авґуст фрішнōтōв завіє,
А пак спека вдарит.
Пораз ся на тучу збират,
Завто дуже парит.

Авґуст виноградом пахне
Й пӯзньыми чічками.
Динь май куртый, сонце ходит,
Но ни дōвго з нами.

Рано смолавоє сходит,
Изябло, пак пріє.
А пō пōлю и кӯсницях
Всячино ся діє.

Ткō сь ищи отаву сушит,
Ци лише скосили.
Нич, ож сōнїчко припече,
Мы ся вже привчили.

Ткō сь выд рана на сотинах,
Булї в відра мече.
Ищи ранинько нам фрішно,
Дальше пак припече.

Авґуст теплый, айбо слїдно,
Куфер си избират,
Бо вже ōсїнь на пӯдхōдї,
В гранкы ся пӯдпират.