Перший сніг

Пробудили сьме ся перше,
Вонка вся́гды снігом першим
Так красно припорошило,
Легкым пірьом насніжило.
Перший сніг - зимы начало,
А пÿд ним ся листя пстало
На земли попочивати
И травичка буде спати...
Вшытко сніг собов накрывать,
Ніжно, гладить, пестить, кывать,
Всягды дочиста хари́ть,
Землю в білоє білить...
Настроєніє чудноє,
Ейфорічноє, ясноє,
Хоче ся когось обняти,
Од душі ся засміяти,
Фіґлювати... Просто жы́ти,
Комусь радÿсть подарити...
Файно, кой усі здорові,
В мирі жыє ся, в любові,
Свады в файті кой ни є,
Розумівуть ся двоє...
Изварю вина я мало,
Што од цімборы дÿстала м,
Мало пікниці урíжу,
Забуджєну, добру, свíжу,
Пÿйду дораз из сим вон,
Там, на воздух, на балкон,
Кипляченоє вино
Вже м не пила штось давно...
Нно. Не пÿллоє се рано -
Динь начинать ся парадно...