Виходні в селі

Ковтать тихо нӱч у двирі -
Проситься у гості.
Мачатка малинькі, милі
Вклалися на постіль.

Тріскавуть дрыва у шпорі:
Теплинько ги в літі.
Файно вто (кедь не йсьме хворі)
Жыє ся на світі!

Из свербигуски звареный
Свіжий тий горячый,
Смачный баник изпеченый-
Маковый, пахнячый.

З чайом в фінджі я присяду
Вд оболоку близько,
Місяць в небі штось там глядать
Над хащами низько.

Темноту із сірых ниток
Нӱч наштріковала,
А на небо із монеток
Звізд поналіпляла...

Прочитаву в інтернеті
Де і што ся стало?
Што нового в цілум світі?
Побзераву мало...

У огинь ковбицю вержу
Най тліє до рана.
Звізды вбралися в одежу
Сріберну, паранну.

Вшыткі сплять вже. Я тихинько
Пӱд паплан ся спрячу,
Діти, я, мачки малинькі
І йся нӱч пахняча!...