Зацвіли нарцисы в полі

Зацвіли нарцисы в полі,
Там де вульхы і тополі,
Де гніздится фурт лелека,
Й Тиса рядом не далеко,
Днись на улици весна,
Пробудила всіх од сна.

Мараморошська долина,
Всяды спів дівочый лине,
Сонце чути вже як гріє,
Й кугутам ся зрана піє,
Літо вже в пути видать,
Зыйде й Божа Благодать.

Коло Хуста на рунині,
Забіліло всьо на днині,
Косичками файно вбране,
Покровало домоткане,
Вздовж нарцисом верло рясно,
Боже, як то дуже красно.

Господа вбы не гнівити,
Йсе нам треба сокотити,
Маєме туй всього доста,
Жиєме обычно просто,
Й ты чужинцю, тоже знай,
В Подкарпатю туй є фрай.

Про русина нич ни гія,
Вбы навхтема лиш добро,
Варышам нашым тай селам,
Вбы ся серинчов вегло,
Бисіду нашу не зря,
Породила йся земля.

Рікы долы хамникы,
Буркутикы-буркуты,
Морське око Синевир,
На полянах пышный пир,
Приголубит всіх она,
Йся прекрасна сторона.

Попуд хащов за Мочарьков,
Коло Бущина села,
На полянку ід нарцисам,
Путь доружка привегла,
Наш сріберный отчый край,
Но та чим исе не Рай.

Радуєся моє око,
В небо никаю высоко,
Дякую за кажьдю днинку,
За благу сытну годинку,
Ныні місяць повный май,
Дай нам миру, дниська Дай.