Клїт

Я кажду вту студену зиму
У кажду споминаву лиш тебе
Кой снїг паде

Любила-сь ты в снїгови быти
Качати ся у тых грудках
У тых днях

Тай очи твої ся всмівали
Из ними сміяв ся и я
Не было там путя

Кой видїло ся, ож снїг грїє
Кой думав им, ож точно любиш ня
Была вто ачий брехня

Гикой выд снїга, студїньов выд тебе віє
Мав я дочасный 'д тому імунітет
Любила ты паштет

У світї твому міста ми ся не убстало
А у мому фурт маєш слобудный столиць
Така-сь ги ти втиць

Прийшла-сь, свої порядкы ушорила
А я наслїпо віровав у вто
Ож без тебе-м — нико

Тай так ото пак ся и стало
Из мене-сь вырвала себе
Ба де вто было, де

Адтуй, у грудьох, всерединї
Там яму ношу за собов велику
Тебе споминаву, дику

Тобі-м увіровав я дуже силно
Ги истину-м узяв лиш твою думку
Пак заперла-сь вту капурку

Убстав им ся пак домак сам
Самый, из ямов, де перич была ты
Куртавут мої дны

Чом я слїпый быв, ож не треба
Тобі спокуйного мене домак
Не так, не сяк

Став им клїтков твойих снув
Заперла-сь ся у минї выд себе самої
Клїты сут ребра мої

Не йшла робити вто, што хочеш
Хотїла-сь быти май блага ид минї
Но жили вбоє-сьме в лупинї

Забыв си каждый, тко што любит
Обы любовку потручати
Треба пробачати

Зо мнов не жила ты домак по свому
З тобов не жив ай я си, неборак
Вшытко было вто не так

Не так ги треба сьме чинили
Удверли каждый сам себе
Ож буде дашто? Не!

Шкода ми ож, сяк ся стало
Пурвали сьме ся мы з тобов
Быв им ти тюрьмов

Пак ись ся урвала, пак утїкла
Тай клїтку свою розорвала на паздїря
Из мене бстала лиш дїря

Так поблындав им пак дале
Не люблю быти я тюрьмов
Хоть любив им из тобов<